స్వప్నం సాకారమైన వేళ ....

స్వప్నం సాకారమైన వేళ

స్వరాష్ట్రం సిద్ధించిన వేళ

అమరుల ఆత్మ శాంతించిన వేళ

అందరి ఆవేదనకర్ధం చూపిన వేళ

ఉద్విగ్నం, ఉద్వేగం  కలగలసిన 

మన గుండె లయ 

జై తెలంగాణా అంటూ నినదించిన వేళ

సంబరాలే జరుపుదామా సంబురంగా..

ఊరూ,వాడ ఆడుదామా ఉత్సాహంగా.. 

జై తెలంగాణా ..!! జై జై తెలంగాణా ...!!

****************************

written by BODDU MAHENDER

at 1:41pm, 18.2.2014

సకల జన భేరి మోగించుదాం రండి

సమాయత్త మవుదాం రండి

సమిష్టిగా గొంతెత్తుదాం రండి

సర్వజన కాంక్ష చాటుదాం రండి

సకల జన భేరి మోగించుదాం రండి

రండి రండి రండి

తెలంగాణా వాద నాదమై రండి

రండి రండి రండి

తెలంగాణా రణ నినాదమై రండి

తెలంగాణా బాటకు బావుటాలై రండి 

తెలంగాణా వాంఛకు వారధులై రండి

****************************

written by BODDU MAHENDER

at 9:55pm, 28.9.2013

మన సంస్కృతిని నిలుపుతున్న ఓరుగల్లు

ఆ పేరులోనే ఉంది విప్లవ సంగీత ఝరి

ఆ రాజ్యాన్ని ఏలింది ఓ వీర రుద్రమ నారి

పేరిణీ తాండవం అయినా.. పెంబర్తి కళ అయినా

  రామప్ప శిల్పం అయినా..  రాజకోట తోరణం అయినా

అది కళలకే  అపర కాణాచి..

కళాకారులకి పరిచే ఎర్ర తివాచీ..

సమ్మక్కలా సమరశంఖం పూరిస్తుంది..

కాళోజీలా కదన కావ్యాన్ని రచిస్తుంది..

అది జన గొంతుకలు ఒక్కటైన తెలంగాణా జాతర

మన సంస్కృతిని నిలుపుతున్న ఓరుగల్లు మాతరా..

**********************************

written by BODDU MAHENDER

at 11:14pm 21.9.2013

ఈ ఉద్యమాలు ఆగవు..

స్వార్ధం, పక్షపాతం నాయకుల్లో ఉన్నంతకాలం

అహంకారం ఆధిపత్యం వహిస్తున్నంత కాలం

ఈ ఉద్యమాలు ఆగవు..

ఈ ఉద్రిక్తత తగ్గదు..

కలిసుంటే మంచిదే అని కలిస్తే,

కబళించుకుందామని కుట్రలు చేస్తే,

ఎంత అమాయకులైనా ఎదురుతిరగక తప్పదు.

ఏమార్చే వాళ్ళ అంతు చూడక తప్పదు.

హక్కులు లేని రాజ్యంలో,

ఆశలు చచ్చిన హృదయంలో,

ఆవేదనే అంతకంతకూ..

ఆత్మహత్య సదృశ్యాలే చివరికంటకూ..

*******************************

written by BODDU MAHENDER

at 11:20am, 9.8.2013

విభజన పరమైన మార్పు తప్ప..

కోరితే తప్పేముంది..?

వీడితే ముప్పేముంది..?

మా ప్రశ్నల్లో న్యాయం లేదా..?

మా పోరాటంలో ధర్మం లేదా..?

మా ఊపిరులకు విలువ లేదా..?

మా  అస్తిత్వాలకి వీలు లేదా..?

ఆధిపత్యం వహించడమేనా..? సమైక్యం అంటే..?

హక్కులను హరించడమేనా..? సమైక్యం అంటే..?

విలీనం నాడే బానిసలయ్యాం..

విభేదాలు చూపినా భరిస్తూ వచ్చాం..

కాలి కింది నేలనే తవ్వితే సహించలేకపోయాం..

ఆత్మగౌరవ బావుటాలమై నింగికెగిసి పోయాం..

అయినా విద్వేషం లేదు.. విభజన పరమైన మార్పు తప్ప..

దురుద్దేశం లేదు.. దుర్నీతికి అంతం పలకడం తప్ప ..

*************************************

written by BODDU MAHENDER

at 5:06am 30.7.2013

ఎప్పుడొస్తది తెలంగాణ?

నిర్లిప్తత మబ్బులో నిస్తేజమైన  నాయకులు 

నిజమైన పోరాటానికి సృష్టిస్తున్న అడ్డంకులు

స్వలాభ కాంక్షే తప్ప స్వతంత్రత పట్టని మూర్ఖులు

స్వరాజ్య సాధనలో సడేమియాగా మారిన ధూర్తులు 

ఇట్లా అయితే ఎప్పుడొస్తది నా తెలంగాణ?

సిరులు, ఝరులు గల్ల నా తెలంగాణ..!!

ఆశయం కోసం అమరులైన వారి కోర్కె తీరేనా..?

అవసరం కోసం అమ్మనైనా తాకట్టు పెట్టే తీరు మారేనా..?

సబ్బండ వర్ణాల సమిష్టి పోరుకి  ఫలితం దక్కేనా..?

సమిష్టియై సమైక్య వాదుల కుట్రని తిప్పి కొట్టేనా..?

ఇంకెప్పుడొస్తది మరి నా తెలంగాణ?

గనులు, ఘనులు గల్ల నా తెలంగాణ..!!

********************************

written by BODDU MAHENDER

at 9:17am 7.3.2013

ఏం ఖర్మ పట్టేరా...ఈ తెలంగాణాకి..

దగాకోరు పార్టీలతో ఆగమైపోతున్నం..

కల్లబొల్లి మాటలతో నిండ మునిగిపోతున్నం..

రేపంటరు..మాపంటరు..రేతిరేదో ప్రకటనంటరు..

ఆకేసి..అడ్డిస్తామని...అన్నమే లేదంటరు...

ఏం ఖర్మ పట్టేరా...ఈ తెలంగాణాకి..

ఏ దిక్కూ లేకపోయే మన వాణికి..

నమ్మి మోసపోతిమిరా ఎండమావికి..

నట్టేటా ముంచితిరిగా ఓ(నో)టు గాలానికి..

*****************************

written by BODDU MAHENDER

at 10am 28.1.2013

జై తెలంగాణా ...

ఆత్మ గౌరవ బావుటా పైకెగరబోతోంది..

సంకేతం ఏదో అందుతోంది..

సందేశం అంతటా చేరుతోంది..  

 సంతోషం లోలోన పొంగుతోంది..  

 సందడిగా ఊరూరు మారుతోంది..  

 అమ్మా.. నీ దాస్యం ఇక తెగిపోబోతోంది..  

 ఆత్మ గౌరవ బావుటా పైకెగరబోతోంది..

********************************

written by BODDU MAHENDER

at 7:35pm 19.1.2013

Jai Telangana .. Jai Jai Telangana..

వీడుకోలు వీడుకోలే బతుకమ్మా..

ఏటేటా నీ పూజలే బతుకమ్మా..

ఏటేటా నీ పాటలే బతుకమ్మా..

మా ఇంటి ఇలవేల్పువే బతుకమ్మా..

మా కంటి మేల్కొల్పువే బతుకమ్మా..

సల్లంగా మము చూడవే బతుకమ్మా..

సొంతంగా రాష్ట్ర మీయవే బతుకమ్మా..

మా యాస భాషలన్నీ బతుకమ్మా..

బతికించే తల్లి నీవే బతుకమ్మా..

ఈ కన్నీటి కాసారాన్ని బతుకమ్మా.

కనకమయం చేయవే బతుకమ్మా..

ఇక వీడుకోలు వీడుకోలే బతుకమ్మా..

వేడుకోలు మావి వినవే బతుకమ్మా..

************************

written by BODDU MAHENDER

at 8:42pm 23.10.2012

మము గాచే తల్లి ఓ బతుకమ్మా..

మము గాచే తల్లి ఓ బతుకమ్మా..

దీవించు తల్లి..గౌరీ బతుకమ్మా..

మా కోర్కె వినవేమే, తల్లీ బతుకమ్మా..

తెలంగాణా ఇయ్యవే, గౌరీ బతుకమ్మా..

మా పిల్లాజెల్లాలు తల్లీ బతుకమ్మా..

మా నేల తల్లంటూ గౌరీ బతుకమ్మా..

ఒక్కొక్క పూవోలె, తల్లీ బతుకమ్మా..

రాలిపోయి నారే, గౌరీ బతుకమ్మా..

వాళ్ళ ఆశల్నే ఇలా పేర్చామే బతుకమ్మా..

అమర స్తూపమై పోయెనే బతుకమ్మా..

మము గాచే తల్లి ఓ బతుకమ్మా..

దీవించు తల్లి..గౌరీ బతుకమ్మా.. 

**************************

written by BODDU MAHENDER

at 7:24pm 15.10.2012

మా ఆత్మగౌరవ దీపికరా..

అణిచేస్తే ఆగిపోతామా..?అంతమై పోతామా..??

ఆధిపత్యం చూపిస్తే అదిరిపోతామా..అసమర్ధులుగా ఉండిపోతామా ..

మా అణువణువునా నిండెనురా..తెలంగాణా కాంక్ష..

మా ఆత్మగౌరవ దీపికరా..జై తెలంగాణా దీక్ష..

***************************

written by BODDU MAHENDER

at 8:10pm 30.9.2012

ఏకశిలా తోరణం...

తోరణం ...ఇది ఏకశిలా తోరణం...

కాకతీయ కళాహృదయ దర్పణం..

వైభవం..మన తెలంగాణా చరిత ప్రాభవం..

ఏదిరా అనే నేతలకి ఎదురొడ్డి చూపాలి పరాభవం..

*****************************
written by ME
at 2:20pm 21.6.2012

కలగానే.......

నిజామోడి  పైశాచికతకి 
నాడు   బానిసలం...
ఆంధ్రోడి దాస్టికతకి 
నేడు బాధితులం...
తరాలు మారినా
మారలేదు మా చరిత..!!

కలగానే మిగిలింది
మా బంగరు భవిత...!!      
*****************************
written by ME,
at 9am 1.6.2010
*****************************
ఈ కవిత వీర తెలంగాణా మాస పత్రిక 
ఆగస్ట్ 2010 సంచిక లో ప్రచురించబడింది... 

మాకొద్దా.. ..

మా  నోటి  కాడి  కూడు గుంజేసుకున్నరు ,
మీ మోచేతి నీళ్ళు తాగమంటున్నరు 
బానిసత్వం మా ఖర్మ అయినట్లు ..
మీ ఆగడాల్ని భరించాల్నా...??

ఆధిపత్యం మీ హక్కు అయినట్లు ..
మమ్మల్ని మీరు పాలించాల్నా ..??
మాకొద్దా.. స్వయం పాలన..??
మాకు లేదా ఆత్మ గౌరవం ..??
జై తెలంగాణా ..!! జై జై తెలంగాణా ..!!

దొంగ దందాలతో మా భూములన్నీ దోచినారు 
పైరవీలతోనే మా కొలువులన్నీ లాగినారు ..
పూట పూట మీ కాల్లోత్తుకుంట ..
మీ బంటులుగా మేం బతకాల్నా..??
నోట్లో ఐదు వెళ్ళు పోక 
పస్తులతో మేం చావాల్నా..??
మాకొద్దా కూడూ గూడూ ..??
మాకు లేవా చదువూ...సత్తా ..??
జై తెలంగాణా ..!! జై జై తెలంగాణా ..!!

****************************
written by ME,

at 7am 9.6.2010

****************************

ఈ కవిత "వీర తెలంగాణా" మాస పత్రిక 
ఆగస్ట్ 2010  సంచిక  లో  ప్రచురితమైనది ..

మీ ఊపిరులను వదలొద్దు..

వేదనల ముసుగు  తొలగక పోదు..
వేడుకల వెలుగు విరియక  పోదు..
అణిచి వేతలు  ఆధిపత్యాలు తొలిగిపోయి
స్వతంత్ర  తెలంగాణా అవతరించక పోదు
ఉద్యమానికి ఊపు తేవాలని 
మీ ఊపిరులను వదలొద్దు..    
కన్న పేగు బంధానికి 
కడ దాకా శోకం పెట్టవద్దు..
భావి తరానికి  మార్గ దర్శకులు మీరు
బ్రతుకు భారం అనుకోవద్దు..
నవ తెలంగాణా వారసులు   మీరు 
తెగించి నిలవడం  మరిచి పోవద్దు..
జై తెలంగాణా !! జై జై తెలంగాణా !! 
**************************************

written by ME,
 at 6am,  2.4.2011
**************************************
ఈ కవిత" వీర తెలంగాణా" మాస పత్రిక 
మే 2011   సంచికలో ప్రచురితమైనది..