మౌనమే..

నిజమే..

ఈ మధ్య 

మౌనమే నన్ను చేరదీస్తోంది.

మౌనమే నాకు చేయూతనిస్తోంది.

మౌనమే మదిని సంతోషపరుస్తోంది.

మౌనమే మహిగా సంతుష్టపరుస్తోంది.

మౌనమే.. 

మాటలన్నీ కరగదీసి

మమతలన్నీ పోతపోసి

మనిషిగా నన్ను గుర్తిస్తోంది.

ఓ మనసుని నాలో చిత్రిస్తోంది.

****************************

written by BODDU MAHENDER

at 9:43am, 6.3.2014

ఆసన్నమైంది..!!

నన్ను నేను వ్యక్తపరిచే 

సమయం ఆసన్నమైంది.

నన్ను నేను బహిర్గతపరిచే 

ముహూర్తం సంసిద్ధమైంది.

ఇక, 

నా నోటికి తాళం వేయను.

నా ఆశకి కళ్ళెం వేయను.

రేపటి స్వప్నానికి హద్దులు గీయను

జీవిత లక్ష్యానికి లంకెలు కట్టను

అవును ..

నన్ను నేను 

వ్యక్తపరిచే సమయం ఆసన్నమైంది.

ఆసన్నమైంది..!!

****************************

written by BODDU MAHENDER

at 7:45pm, 25.2.2014

తెలుసుకొని..తేరుకొని..

చీకట్లోనే ఉన్నాను ఇన్నాళ్లు

చీకటిని తిడుతూ కాదు, వేడుతూ..

నన్ను తనతో దాచమని,

నన్ను తనలా మార్చమని..!!

కానీ వేకువనే చూశాను ఒకరోజు

వేల్పుగా కొలిచాను ప్రతిరోజు..

వెలుగు విలువ తెలియడానికే  చీకటని,

సుఖం స్థాయి పెంచడానికే కష్టమని

తెలుసుకొని..తేరుకొని..

నన్ను నేను మలుచుకున్నా  ఆ రోజు..

“నన్ను” నేను చూసుకుంటున్నా... ఈరోజు..   

*****************************

written by BODDU MAHENDER

at 5:49pm 11.2.2014

అయినా ఆశ చావలేదు ఆద్యంతం

నన్ను నేను శోధించుకుంటున్నా

నాకు నేను బోధించుకుంటున్నా..

నా కలలని ఓర్పుగా పోషించుకుంటున్నా 

నా కళలతో నేర్పుగా నిర్మించుకుంటున్నా

కాలం కల్పించిన ఈ ఏకాంతం

విధి విధించెను జీవితాంతం

అయినా ఆశ చావలేదు ఆద్యంతం

ఆత్మీయతకు లేదు ఏ అంతం

 *****************************

written by BODDU MAHENDER

at 9:15pm, 17.1.2014

ఎవరికి తెలుసు..?

ఈ నిశ్శబ్దం వెనుక దాగిన

నిర్వేదం ఎవరికి తెలుసు..?

ఈ నిస్పృహని పెంచిన

నిరాశ ఎవరికి తెలుసు..?

అలుపు లేకుండా శ్రమిస్తున్నా

ఆర్ద్రత అణుచుకొని లిఖిస్తున్నా 

అంతరంగాన్ని వేధిస్తున్న

ఆ ఆత్రం గురించి ఎవరికి తెలుసు..??

అన్నీ ఉన్నా ఆ ఒక్కటీ లేని

ఈ వెలితి గురించి ఎవరికి తెలుసు..??  

******************************

written by BODDU MAHENDER

at 10:30pm 7.1.2014

నాలో భావాల అవక్షేపం

ఎందుకే...

నిన్ను చూస్తే

గుండె తడవుతోంది..

 కన్ను నీరవుతోంది..

మాట పెగలకుంది..

బాధ వదలకుంది..

నువ్వు నా కాలక్షేపం కాదు.

నాలో భావాల అవక్షేపం..

ఓ స్వేఛ్చా విహంగ స్వాప్నిక

నా ప్రణయ దేవేరి రూపిక

  మరిచేనా నిను కలనైనా..!!

మరి చూసేనా ఈ ఇలపైనా..!! 

****************************

written by BODDU MAHENDER

at 10:45am, 2.12.2013

కాలపరీక్షలో....

నేను నేనుగా ఎదిగేందుకే ఈ తాపత్రయం

నన్ను నన్నుగా చూపేందుకే నా కూతూహలం

కళ్ళు తడి అవుతున్నా కాళ్ళు ఆగడం లేదు

ఒళ్ళు హూనమవుతున్నా దారి విడవడం లేదు

   ఆందోళన వేధిస్తున్నా, 

ఆశల పల్లకిలో ఊరడిల్లుతూ ఉన్నా...

అవమానాలెదురవుతున్నా,

ఆశయాల పల్లవినే పాడుతూ ఉన్నా...

విజయం చేరే వరకేగా ఈ వెక్కిరింతలు

విజయుడైన నాడు, అవే వేనోళ్ళ పొగడ్తలు..

ఈ కాలపరీక్షలో, నేనో 

కఠిన హృదయుడిగా మారిపోతున్నా..

కల్మషం లేని ఓ జతకై ఇంకా పసివాడిగానే ఉన్నా..

  కలలలోకమని నిత్యం పరుగులిడుతున్నా.. 

ఓ కాంత చెంత నిశ్చలమైపోవాలని నిశ్చయమైయున్నా..

************************************

written by BODDU MAHENDER

at 12:50pm, 30.11.2013

నాకు స్వాతంత్ర్యం కావాలి

నాకు స్వాతంత్ర్యం కావాలి

స్వార్ధం నిండిన రాజకీయం నుండి

స్వశక్తత వీడిన యువతరం నుండి

కన్నీళ్లు నింపుకునే పేదరికం నుండి

కల్మషం పంచుకునే నాగరికం నుండి

నాకు స్వాతంత్ర్యం కావాలి

మనసుని మరిచిన మనుషుల నుండి

మానవత విడిచిన మూర్ఖుల నుండి

సంఘ విద్రోహ శక్తుల నుండి

సంస్కరణాభిలాష లేని యుక్తుల నుండి

నాకు స్వాతంత్ర్యం కావాలి

నాకు స్వాతంత్ర్యం కావాలి

****************************

written by BODDU MAHENDER

at 8:12am 15.8.2013

నాకు నేనే అయ్యా స్నేహితుడిగా..

ఎందుకో  స్నేహం నాకు సరిపడలేదు..

నిజం చెప్పాలంటే అది నాకు అచ్చి రాలేదు..

స్నేహం విలువ తెలిసిన వాడినయినా,

ఆ  స్నేహ మాధుర్యం ఎన్నడూ పొందలేదు..

ఏ నిజ స్నేహం నాతో చేయి కలపలేదు..

వంచించిన స్నేహాలు

నాలో స్నేహపు వాంఛని తగ్గించాయి..

వస్తువని భావించిన స్నేహాలు,

నన్ను వాడుకొని వదిలేశాయి..

అందుకే

నాకు నేనే అయ్యా స్నేహితుడిగా..

నా మనసునే చేసా దానికి సన్నిహితుడిగా..

**********************************

written by BODDU MAHENDER

at 12:46am 4.8.2013

ఎందుకో..

ఎందుకో..

నా కంటి మీద తడి ఆరడం లేదు ..

కలలకి అవకాశం ఇవ్వడం లేదు.

నిజం కాదన్నా నమ్మడం లేదు..

నేనెప్పుడూ ఒంటరినే అని, 

గుర్తు చేయడం మానలేదు.. :(

**********************

written by BODDU MAHENDER

at 9:44am 16.7.2013

అపురూపమైన ఆ క్షణాలని మళ్ళీ మళ్ళీ ఏరుకోవాలని

గతిస్తే కానీ విలువ తెలియలేదు

స్మరిస్తే కానీ గుర్తు నిలవలేదు

ఈ యాంత్రిక వడివడి జీవితంలో 

స్థితిగతులనే ఎంచి చూస్తున్న తరుణంలో 

మలినమంటని నా మనసు ముత్యాన్ని 

మరలి రాని ఆ బాల్యపు సొగసుని 

ఆర్ధ్రంగా తడుముతూ, ఆత్మీయంగా పొదుగుతూ.. 

అపురూపమైన ఆ క్షణాలని 

మళ్ళీ మళ్ళీ ఏరుకోవాలని 

అన్వేషిస్తున్నా .. 

అంతులేని నా గమ్యాల వైపు.. 

అలసట తీర్చే ఆశల తీరాల వైపు.. 

అందమైన చిలిపి ఊహల వైపు.. 

అచ్చమైన నా పసితనపు జాడల వైపు ...

*****************************

written by BODDU MAHENDER

at 12:40am 14.7.2013

కాంక్ష వీడక సాగుతున్నా..

అడుగడుగునా  అభద్రత..

ఆలోచనల్లో అస్థిరత.. 

అనుకున్నది సాధిస్తానా..

అజేయుడనై చూపిస్తానా...

నన్ను నేను నిరూపిస్తానా..

నా ప్రేమను గెలుపిస్తానా..

దారులన్నీ మూసుకుపోతున్నా..

దరి వెతుకుతూ వెళుతున్నా..

కలలన్నీ కరిగిపోతున్నా..

కాంక్ష వీడక సాగుతున్నా..

ఏదో రోజు నాదవుతుందనే ఆశతో..

రేపటికి నా చరితే చూపవుతుందనే ధ్యాసతో..

*******************************

written by BODDU MAHENDER

at 3:45pm 2.5.2013

నేస్తం ఒకటి ఊపిరినిచ్చింది.

ఆశ ఒకటి అవకాశమైంది.

అంతమయ్యే స్థితిలో ఆయువయ్యింది.

నేస్తం ఒకటి ఊపిరినిచ్చింది.

మార్గం చూపి మనసుని అల్లింది.

కల ఒకటి కళగా మారింది.

కడు వేదనలో నా కన్నీటిని తుడిచింది.

విజయం ఒకటి నా చెంతన చేరింది.

విశ్వ జనతకి నన్నే రాజుని చేసింది.

గర్వమొకటి నా పెదవిన నవ్వింది.

గత బాధలని తుడిచేస్తూ నా గమ్యాన్ని చేర్చింది. 

*******************************

written by BODDU MAHENDER

at 1:45pm 5.4.2013

పెళ్ళాడాలని ఉంది..

పెళ్ళాడాలని ఉంది..

ప్రేమించి పెళ్ళాడాలని ఉంది..

ఉడుకు నెత్తురు ఊహలు ఉసూరనకముందే.. 
కొంటె వయసు కోర్కెలు కొడిగట్టకముందే... 
పెళ్ళాడాలని ఉంది..

ప్రేమతో పెనవేయాలని ఉంది..

***********************************

written by BODDU MAHENDER

at 10:25pm 2.4.2013

ఆ వేదనలోనే ఆనందం వెతుకుతుంటాం..

ఎందుకో అర్ధం కాదు,

మనం అంటే పట్టని వాళ్ళ గురించే 

ఎక్కువ ఆలోచిస్తాం..

మన తోడు కావాలనుకునే వాళ్ళని 

దూరం చేసుకుంటాం..

బంధం అయినా, బాధ్యత అయినా 

ఆ వేదనలోనే ఆనందం వెతుకుతుంటాం..

******************************

comment written by BODDU MAHENDER

నిజమయ్యే కలల ముంగిట్లో ...

ఎవరేమనుకున్నా ,

నేను సాధించాను కొన్ని..

ఎదురేమున్నా ,

ఏరిపారేసాను కొన్ని ..

నా పథం – పదం :  ప్రేమ

నా గురి – దరి :  ప్రేమ  

నిరాశను  ప్రేమిస్తాను..

నిశీథిని  ప్రేమిస్తాను ..

నీ ఆశని నేనయ్యేందుకు

నిమిష నిమిషమూ శ్రమిస్తాను..

నిన్నటిని శ్వాసిస్తాను

రేపటిని పోషిస్తాను..

నిజమయ్యే కలల ముంగిట్లో 

కళల హారమై నిలుస్తాను... 

***************************

written by BODDU MAHENDER

at 3:38pm 15.3.2013

కాదంటావా ప్రియ నేస్తమా...

ఎందుకో తెలియని సంఘర్షణ ....

 ఏ వెలితి తోనో సాగిస్తున్న జీవన ఘర్షణ..

ఇదని చెప్పలేను.. అదని కోరలేను..

నా అస్తిత్వం నాకే తెలియనప్పుడు..

నా ఆశయం నన్నే విడిచినప్పుడు..

నీ మాటే నాకు ఊతం అయ్యింది..

నీ బాటే నాకు పాఠం అయ్యింది..

కాదంటావా ప్రియ నేస్తమా...   

*************************

written by BODDU MAHENDER

at 11pm 26.2.2013

అలాగే ఈ టీవీ కూడా..

మనం చూసేదాన్ని బట్టే ఈ లోకం..

మంచికి మంచే కన్పిస్తుంది..

చెడుకి చెమటలు పట్టిస్తుంది..

అలాగే ఈ టీవీ కూడా..

నిన్ను నిర్మిస్తుంది..నీకో దారి చూపిస్తుంది..

నీ ప్రపంచాన్ని నీకే కొత్తగా పరిచయం చేస్తుంది..

కలలని పెంచుతుంది..కళలని చూపుతుంది..

కలకాలం వాటిని జ్ఞాపకాలుగా దాచుతుంది..

అందుకే నాకిది నేస్తమైంది..

నా భవితకి సమస్తమైంది.. 

*******************************

written by BODDU MAHENDER

at 7:30pm 10.2.2013

సాక్ష్యమయ్యే నా ప్రతి అక్షరం..

ప్రశ్నకి ప్రశ్నే ఎదురైతే..

సమాధానమే దానికి కరువైతే..

ఎన్నటికీ చేరువకాని మనసునే 

బహుమానమని నాకు వదిలేస్తే,

అర్ధం కాని నీ తత్వానికి,

అయోమయమయ్యే నా జీవితానికి,

సాక్ష్యమయ్యే నా ప్రతి అక్షరం.. 

స్వప్నా లనే చూస్తూ  ప్రతిక్షణం.. 

*****************************

written by BODDU MAHENDER

at 2:35pm 2.2.2013

తప్పెవరిది..?

తప్పెవరిది..? లోపం ఎక్కడుంది..?

మనిషిని సరిగ్గా అంచనా వేయలేకపోయానా..? 

నా మనసుని అదుపులో ఉంచుకోలేకపోయానా..?

వ్యక్తి తప్పుకి వ్యవస్థని తప్పు పట్టాలా..?

సమూహం తప్పుకి సమాజాన్ని నిలబెట్టాలా..?

ఒకరే అనుకుంటే అంతా అలాగే ఉన్నారేం....?

చెలిమి ముసుగులో చెడు చేసి పోతున్నారేం...?

అబద్ధాలు ఆడుతూ ఆదర్శాలు వల్లిస్తున్నారు..

అనురాగం నటిస్తూ ఆప్తుల్నీ వంచిస్తున్నారు...

నమ్మకం అనే దానిపై నమ్మకమే లేకుండా చేస్తున్నారు..

మోహ,వ్యామోహాలకే దాసోహమై పోతున్నారు..

నిజంగా ఏకాంతమే నాకు సరైనది అనిపిస్తోంది..  

నాలో నేనై జీవితాన్ని గడపాలి అనిపిస్తోంది..

******************************

written by BODDU MAHENDER

at 1:16pm 22.1.2013