రండోయ్.. రారండోయ్...
రాటుదేలిన రాతగాడని
నా మోతే మోగించండోయ్
తుచ్ఛరితే రాయించండోయ్
రండోయ్.. రారండోయ్...
గణ "భజన"ల మొనగాడని
చాటింపే వేయించండోయ్...
పైమెరుగులే చూయించండోయ్
రండోయ్.. రారండోయ్...
రంకు నేర్చిన బొంకు వినరండోయ్
ఇంకు లద్దిన జంకు కనరండోయ్
స్వార్థమున్న సలహా తెలుసుకోండోయ్
సత్య చైత్యన్య స్ఫూర్తితో మేలుకోండోయ్
నా అవసరానికే మీరు..
నాతో సరితూగే దెవరు..
నా అనుచరులుగానే మీరు
నాతో తలపడే దెవరు..
పల్లకీ తెస్తే బోయీ లయ్యేరు
పటాటోపం చూసి బానిస లయ్యేరు
అబద్ధాలు అవధానంలా చెప్తే
ఆత్మీయతలు రంగరించి మురిసేరు
అవార్డులు అంగడి సరుకులా కొంటే
ఆదర్శాలకు ఆమడ దూరమని మరిచేరు
ఇక ప్రశ్నించే దెవరు..నా ప్రతిభని..
పరిశీలించే దెవరు.... నా ప్రగతిని..
చిరునవ్వునే చూస్తూ పోతే
చిట్లించిన నా నొసలెక్కడ కనబడేది
సనాతనమని సమ్మతిస్తూ పోతే
స్వ వర్గ జెండా, అజెండాలే కదా ఎగిరేది..
నీతి మాటలన్నీ నీటి మూటలని
రాత గీతలన్నీ చేత కానివని
ముసుగేసిన నా మనసు మరుగు
తెలిసిన నాడే,
మీరు బాగుపడేది.. సాహిత్యం కుదుట పడేది..
బొడ్డు మహేందర్
చెన్నూరు, మంచిర్యాల జిల్లా
ఫోన్ 9963427242
April 6, 2023
No comments:
Post a Comment